Tuesday, November 28, 2017

ඔබට කියමි

Saatchi Art Artist: Loui Jover; Ink 2015 Drawing "long way away...

නැවතිලා
මං උන්නු
මං කඩේක
කෙකටියා
යායට
පැළ වෙලා.....
ඒ මතින්  
සීරුවට 
පැණි කුරුල්ලෝ
නුඹ
තාලයට 
අඩි ආයේ 
තියනවා 
නිදිවරු මං
නැතත්
සේපාලිකා
නුඹේ
තනියට ඉන්නවා
නුඹේ නමින් ගිළිහෙන 
බිම වැටී 
පෙති බිඳුණු 
සේපාලිකා 
එකින් එක 
මම ගණිනවා 
හමු උනත් 
ආයෙමත් 
උණුහුම්ම 
ඔබේ 
හිරු එලියට 
පිටුපා 
කණමැදිරියකු 
වී 
ඉතිං 
නික්මෙනවා  
මං
එරන්දී 
ප.ලි. මෙය ජිවිතේ යාත්‍රාව ලියු හරි අපුරූ කවියක් නිසාම ලියැවුණු සිතුවිල්ලක.

Friday, October 6, 2017

Happy 41

 
 
                             
                                                                
උඹ තමයි මිනිහා
සවන් දෙන්නියකටත්
සවන් දෙන....
කට්ට කළු
උස මහත
ඝන ඇහි දාර යට
බොර පාට ඇස් ඇති
දැලි අඟුරු තොල් අස්සේ
මුතු පාට දත් ඇති
පුළුල් උරහිස් අතරේ
රතු පාට පණ  විදින
හෘද මාන්ෂලය ඇති
හීන් කඳුළකින් තැවී
එය ද උගුලවා දිය හැකි....
සියුම් තුඩකින්
ම’කුස දැදුරු වූ දා 

සිහිසුන්ව ඇද වැටුණු....... උඹ තමයි ඒ මිනිහා
නිවුඩු හාල් බතට
පොල් සම්බෝලයි ඇඹුල් තියලයි
කෑවාට 
නොවරදවාම 
මට සිරියල් අරන්දුන්න.....
කවි ලියන එකත් 
ඇරියස් එකක් කිව්වාට 
ඇති තරම් කඩදාසි 
Parker pens  අරන්දීපු
යකෙකුගේ පෞර්ෂය තිබුනාට, 
යක්ෂණියක් වගේ කඩා පැන්නාම  
ඔළුව අතගාල පපුවට තුරුළු කරගත්තු.... උඹ තමයි ඒ මිනිහා ..........

නුඹ නිසා වාසනාවන්ත මම යි ඒ 
එරන්දී 

Wednesday, September 27, 2017

IRAJ - Inspiring Rumor, Aiming Judgements :)



එදා මෙන් අදත්
අද මෙන් හෙටත්..............

                                      .

                                      .
ධමනියක ඉපිලී 
නැවුම්
ශිරාවක ලතව 
පසු බැස කිළිටිව 
සෙමෙන්
ලබ් - ඩබ්ව 
පණ ගැහෙයි 
රිසියෙන් 
සෘතු අතර 
යෙහෙන්....
වනට වැද 
සිංහයකු හා සමඟ ද 
ධනුද්ධර හැර වැද්දකු ද 
සිතාය කෝ කොහි ද 
මන්දෝදරී.... 

ස සමඟ ප 

ඒ 

කරළියෙහි 
Market 
වෙන්නේ ම  
අඩ අඳුර ය......
අපි ඉන්න 
ගැලරියේ......

මං එරන්දී 


Sunday, September 10, 2017

දරුවා සහ මව

ඔන්න හැමදාම හවස ගෙදර එනකොට මගේ ඔළුවට එනවා මාරම Plan. ඇත්තමයි අද තමයි දවස.. , අද උයනවා රසම රසට... ඊට පස්සේ තුන්දෙනත් එක්ක වාඩිවෙලා දවසේ විස්තර කිය කියා කනවා........ ඔන්න ඔය වගේ ගොඩක් දේවල්.....

ඔන්න ගෙදර ලං වෙනවා..... මෙන්න මං යනකොට දෝණි රසකර කර කනවා මොනවද.... මොනවද ඉතිං Pop-corn.......  අයියෝ...... මොන රහක් හින්ද ද ඔය කන්නේ..... ඉතිං ඔන්න මට තරහ යනවා...... (හිතුවා නේ පොඩි එකී ගුටි කැවා කියලා..... මං කිව්වේ තරහා යනවා කියලා , එනවා කියලා නෙවෙයි නේ..:)  )

මාත් හෙමිට වාඩිවෙනවා දෝණි ගාවින්...... මගේ දෝණි හරිම හොඳයි.....
"අම්මිට මහන්සිද"
"තේ හදන්න ද "

එපා පැටියෝ මටත් ඔන්න ඔකෙන්ම ටිකක් දෙන්න... ඔන්න ඉතිං අපි කනවා.... අනේ ලස්සන Cartoon යනවා.................... ඉතිං මං බලනවා.... දෝණි එබිලා මං දිහා බලනවා.. එයා homework කරනවා මං Cartoon බලනවා....

අම්මි ආසද Cartoon බලන්න.. හ්ම් ....... ඇයි අම්මී ඒ........

මං කෙලින් උනා current වැදිලා වගේ.. නැ මේකනේ අක්කි වැඩේ (ලොකු කතාවක් කියද්දී එයා අක්කි මං නංගි )
මං චූටි කාලේ අම්මා'ම්මා මට TV බලන්න දුන්නැ නේ අක්කි එකයි.......
අනේ මගේ Cutie පව්...... (එහෙම කිව්වේ දෝණි ,මට )

ඉන්ඩ මං අහන්නම් අම්මා'ම්මා ගෙන්..... ආම්මෝ එපා මං එයාට බයයි Please...........
(හා ඒ කථාව එතනින් Shape එත් ඉවර වෙන්නේ ඕක දෝණි අම්මා ගෙන් අහලා අම්මා මට....... එක්කෝ ඕනේ නැ.................. )

(ඔන්න දෝණිගේ වැඩ ඉවරයි.....)  අහ්හ්හ් අම්මී.. අම්මී හරිම කම්මැලියෙක් නේ..... (ඒ මං නිදිකිරණ වෙලාව...) 

අයියෝ මේ බලන්න අම්මි තාම සපත්තු ගලවලාත් නැ ..... ඉන්න මං ගලවන්න 
එපා එපා මං ගලවන්නම්.... අනේ පුතේ මේ සපත්තු දෙක අරන් තියනවා  ද...? 
ඉතිං පුංචි දරුවෝ වගකීම් දරන්න බොහොම කැමතියි.....

නැතුව 

මං 
කම්මැලි 
එරන්දී 
නෙවෙයි

(දරුවන් ඉගෙන ගන්නේ අහන දකින දේ වගේම පුංචි පුංචි වගකීම් දැරීමෙන්. වැඩිහිටියන් හැටියට් හැකි සැම අවස්ථාවකම දරුවන්ට වගකීම් දරන්නට අවකාශ සැලසීම , ඔව්න් ට නොදැනෙන්නට ඔවුන් පිටුපසින් සිටිමින් දිරමත් කරන්න. එක එක චරිත වලට ඔබ ආරෝපණය වෙන්න,
උදාහරණයක් ලෙස මම නංගි පුතා තමයි අද අක්කා
මේ තුලින් ඒකාකාරිත් වය නිසා නොසන්සුන් වන දරුවාට විනෝදජනක ක්‍රීඩාවක මුහුණු වරින් ජිවිතේ හුරු කරන්නට තරම් ඔබ බුද්ධිමත් වන්න)

Friday, September 1, 2017

අපේ කතාවක්

14ක්, ඔබ හා මං එරන්දී


ජිවිතේ අපි ගෙවා ආ දුර
එක්ව වැටී වැටී නැගිට්මින්
නැග්ගේ කඳුමයි
පල්ලමක් නොදුටුව තරම්
නෝක්කාඩු ද රැවුම් ගෙරවුම්
තිබුණා සත්තයි එත් කෙනෙහිලි
මං අතින්............
යකෙක් ඇත්තම ගොරවනා විට
මේඝනාද ද පරදවයි
කිසිත් කිසිදා එවන් කිපුමෙන්  
ඔරවලා නැ
ඒ මට සහතිකයි...........
ඉතිං තරහයි
දෝණි තුරුලේ නැල උනෙන්
රැවූම් ගෙරවුම් වැඩි වෙන්නේ
මගේ ඒ සැනින්,
සියල් සිතුමන් හොඳින් හදුනන
උතුම් පපුවකි රළු හමට යටින්
ලියන්නට නම් චීන පවුරත්
දිගම දිග මදි ඔබ නමින්
හිතට බය මගේ
තවත් භවයක
ගමන දිඟු වේ ද
මේ ලෙසින්........

 මං එරන්දී 

Thursday, July 27, 2017

රළ - වෙරළට සෙනහසින්....

 It tells "you'll always walk together". 
අතුරලා රැළිති කෙහෙ රැළි
විසුරුවා විසල් පපුතලේ..
යොමා සවනත 
පියා නෙතු පිය
අසා ඉන්නට 
ස්නේහයේ ස්වරය...
සුසුම් සුවඳේ හී 
නැහැවී
මතක විසුරුවා 
ස්නේහයේ...
යළිත් ඇවිදින් යන්න 
එන්න හිතයි මට ආයේ.....
මං එරන්දී....

Tuesday, July 11, 2017

අම්මා

අම්මා මගේ Posh නැත.....
පලින් පල සුදු කෙස් එක දෙකක් ඇත 
Under eye cream ගැන ඇය කිසිත් අසා නැත
ඇස් යට යන්තමට දැන් රැළි වැටී ඇත
දේදුණු වන් හැඩ ඇහි බැමක් ඇත
සත්තයි ඈ වැස්සකටවත් Saloon ගොස් නැත

අපේ ගෙදරට Alarm නැත
3 ට ඇහැරෙන අම්මා කෙනෙක් ඇත
සෙමින් පිරිමැද අවදි කරනා දෙවඟනක් ඇත
දුවෙක් මුත් මං පුතේ කියනා අම්මා කෙනෙක් ඇත
Darling කියන්නට මට Mummy කෙනෙක් නැත

BBC update නොවනා අම්මා කෙනෙක් ඇත
එනමුදු විශ්වයම ඇය දෙපාමුල ඇත
Siri උනත් නොදන්නා බොහෝ දේ ඇත
ලොවම අතබුලකි අම්මා ඇති තැන 


සුරතල් දකින්නට දැන් ඇයට තව අය ඇත

අටලෝ දහමෙහි හරය කියා ඇත
හොඳ නරක ගුණඅගුණ ඈ කියා දී ඇත
කරදර එන්න පෙර සෙත් පිරිත් කියා ඇත
බුද්ධියම පිහිට කොට සරණ යන්නට කියා දී ඇත
නිවන් යන්නට ඇය පන්ති ගියේ නැත

ලියන්නට තව බොහොමත් ඇත 
ලියා නිමවන ඉමක් නොපෙනෙන.... අම්මා කෙනෙක් ඇති
මං 
එරන්දී.....

Tuesday, July 4, 2017

මනස - මං එරන්දී

මෙන්න මෙතන කියපු විදිහටම මං පොරොන්දුව ඉෂ්ට කළ අතර මේ ලිපියෙන් විස්තර වන්නේ මං එරන්දීට අනුව HeightPhobia  සහ ShoeManiac  ගැන කරුණාවෙන් සලකන්න

මං අපේ පවුලේ බාලයාට කලින් එකී....., බාලයා චූටි නංගි...හෑ........... 


(දැන් එතකොට කලින් කිව්වේ පවුලේ බාලයා ය ඉන්නේ අක්කලා දෙන්නෙක් විතරක්ය කියලා..?  

හරි ඉතිං ඒ කිව්වේ අපේ ගෙදර ගැන මේ කියන්නේ මව් පාර්ශවයේ මහ පරම්පරාව ගැන )

පවුලේ බාලම කොල්ලා බැන්දා . 

ඉතුරු වෙලා හිටියේ චූටි නංගි විතරයි..... එයත් ගිය මාසේ මුල කසාද බැන්දා.... (ඉතිං අපේ මොකෝ) 

එහෙම හිතන්න එපා හිතාදර මිතුරනි... ඒ විවාහයත් සමඟ මට අත්වූ ඉරණම ඉතාම ඉතාම........................................ වැඩක් නැ එක්කෝ කියලා......... ඔබට හිතාගන්න පුළුවන් නේද.............. (අපිට වෙන වැඩ නැනේ මෙයාගේ ඉරණම ගැන හිතන්න හහ්...)


මා අගතියට පත්විය..... මින් මතු දවසේ පැය විසි හතරේන් ඕනෑම මොහොතක ඇගේ මනරම් අඳුරු ගුහාවට කඩා වැදීමේ අයිතිවාසිකම මා වෙත අහිමි වුයේය.... එය වඩා හොඳය , නැත්තම් මා කුමන මොහොතක හෝ මිය යන්නේ ගුටි කෑමෙන් නොව හුස්ම හිරවීමෙන්ය.... පතලකට බැස මැණික් සොයන්නා සේ මා ඉතා වෙහෙස වී හාරා අවුස්සා සොයනුයේ ඇය ලොවපුරා ඇවිද ගෙන එන සුවඳ විලවුන්ය.... නිය ආලේපනය..... දෙවියනේ සපත්තුය....... අම්මෝ අත් බැග්ය... තවද මනකළඹන පිස්සු හැදෙන  විසිතුරු බඩුය......... එපමනක් නොව රස නහර පිනා යන චොක්ලට්ය....... මේ කිසිවක් මිළදී ගැනීමෙන් කිසිඳු වටිනාකමක් හෝ රසයක් නොදැනෙන අතර නංගිව මංකොල්ල කෑමෙන් පමණක්ම උදාකරගත හැකි සතුටකි...... (එය දන්නේ ද නංගිලා ඉන්නා අක්කලාම පමණක්ය )

මේ අකටයුතුකම් දරාගනු බැරි තැන 
"මං එයාගේ හස්බන්ඩ් " - මේ පොඩි එකාගේ දේවල් ගන්න ඔයාට ලජ්ජා නැද්ද , තියලා යන්නයි කිව්වේ ආදී වශයෙන් තර්ජනය ආරම්භ කරන ඒ සමාරම්භක මොහොතේම 
විත්තියේ නීතිඥ හෙවත් පුංචි අම්මා වහාම මා වෙනුවෙන් ඉදිරිපත් වන්නේය.....  පොඩි කාලයේ මා විසින් නංගි බලාගත් හැටි ද ඒ නිසා මට ද මේ සියල්ල අයිති බව ද තර්ක විතර්ක මද්‍යයේ ගෙනහැර දක්වන අතර විත්තියේ සාක්ෂි වෙනුවෙන් පෙනී සිටිනුයේ ද නංගි මය...... නංගි "පොඩි ඒකිගේ ආසාවනේ අයියේ , කමක් නැ මං ඊලග පාර ගන්නවා ඔයිට වඩා අරක මේක බ්ලා බ්ලා..... " යනුවෙන් කරුණු දක්වා සමතයකට පත්වන්නේය. ඊලග වතාවේ ද පැයක් දෙකක් පොරකමින් ද පුංචි විසින් packing කඩා නැති සියළු බඩු සොයමින් මා වෙත ගෙනවිත් තබන අතර  
මං එයාගේ හස්බන්ඩ් මඟ දිගට නංගි විසින් උපුටා දැක්වූ සාක්ෂි සහ කාරණා ඉදිරිපත් කරමින් "ඊයා මේ......." යැයි නැළවිලි ගී ගයනා විට මට සැනසීමේ නින්ද යන්නේය...... ඉහත සියළු ප්‍රතිලාබ අහිමී වීමේ දුක ද අළුත් මල්ලි ඉදිරියේ එසේ හැසිරීම නොහොබිනා බැවින් ද මං මහත්සේ දුකට පත්ව සිටින්නේය..........
ඒ දුක කෙසේ උවද ස්ථානොචිත ප්‍රඥ්ඥාවෙන් යුතු මා විසින් කල්වේලා බලා නොහොත් අපගේ දිව්‍යරතයෙන් බිමට බට මොහොතේම දිව ගොස් කොණ්ඩයක් වවා පොනිටෙල් දමා උන් ශක්තිමත් ඔහු වෙත කඩා පැන... මේ අංකල් නේද අර චිත්‍රපටිවල එහෙම ගුටු කන සීන් වල ඉන්නේ යැයි ඇසු කළ මගේ පිටට මී මැස්සෙකු හාදු දුන් තරම් සනීපයක් දැනෙන්නට විය. ඒ අපේ අම්මාය....... ඔහු චූටි නංගි ගේ මනමාල මල්ලිගේ පියාය....
අම්මලාගේ හැටි එහෙමය.... එත් අඩි උස සපත්තු ඉල්ලා හඬා වැටෙන විට දෙවරක් නොහිතා අරං දෙන්නේ මං එයාගේ හස්බන්ඩ් ය. ලාඩන් ගැසූ වෙලබක ලෙසින් ඕනෑම උත්සවයක ආරම්භයේ ඊට සහබාගි වන මං, උත්සවය මැද භාගය වන විට ලාඩම් ගලවා අපවෙනුවෙන්ම වෙන් කළ VIP  මේසයේ බිමට එල්ලා වැටෙන මේස ඇතිරිල්ල යටින් ආරක්ෂාවට තබන්නේය. ඉන් පසු මගේ වාර්තාගත උස අපේ පපරාසින්ගේ ෆොටෝ වල හිටීවි යැයි බියවන මා එකදු ෆොටෝවකට හෝ අවසර දෙන්නේ මං එයාගේ හස්බන්ඩ් ළඟ සිටින්නේ නම් පමණක්මය.... 
කැළැල් වැසෙන්නට මේකප් බාල්දියක නොබසින මගේ සඳවන් මුහුණේ හත් අවුරුද්දක් සාගින්නේ හිටි බව හැගවිමට හකු අකුලාගෙන කට උල් කරගැනීමට වෙහෙස නොවනා අතර පෘෂ්ටිමත් ශරීරය , සඟවන්නට පණුවෙකු සේ හැරෙන්නේ ද නැත. නමුත් කොට බව ප්‍රදර්ශනය වීම මහත් ගැටළුවක් වන අතර මං එයාගේ හස්බන්ඩ් ගේ කකුල උඩ හිටගැනීමෙන් ප්‍රශ්නය විසඳාගන්නට හැකිය. වැටේ යැයි බියෙන් ඔහුගේ ඇඟේ එල්ලෙන අතර නොදන්නා අය "අනේ වාසනාවන් , So lovely couple " කියන අතර දන්නා අක්කලා කෝචෝක් කරන්නේය. ඊට වාඩුව ලෙස කටවල් ඇද වූ සහ කාන්තාරයේ සිට මේ දැන් ක්‍ෂේම භූමියක් දුටු set එකක් මෙන් කාන්තාරපස තැටිපිටින් ගිලදමනා පිංතුර ගන්නා අතර ඒවා පෙන්වමින් කටවල් වසා දමන්නේ කිසිදු තර්ජනය කිරීමකින් තොරවය. 

මේ සියළු සිදුවීම් අස්සේ 

නංගි පිට වන මොහොතේ කොහෙදේ සිට පැමිණි ලොකු අයියා (එයා ද අපේ පරම්පාරාවේ ලොකුම අයියා ය.... මතක විදිහට පනහත් පැනලාය.... ) අද දීගෙක ගිය නුඹ මට කියන්නට පටන් ගත් අතර මං හොඳටම හඬා වැටුනේය....... ඒ ඇය විවාහ වූ නිසා නොව 
අවංකවම කිව්වොත් චූටි නංගිගේ විවාහයට කලින් මල්ලි ශේප් කරගන්නට කල් මදිවූ නිසාය......... 
ඉතිං සියළු ප්‍රිය සම්බාෂණ කෙළවර සියල්ලෝ සතුටින් විසිර යන අතර අස්ස ලාඩන් දෙක පයේ නොව අතේ ලාගෙන ගෙදර පැමිණෙන 
මං 
අම්මේ ඔව්                               

එරන්දී...... 

 .


ඉයන් අයියගේ පොල් මැල්ලුම රෙසිපිය ගත්තාට ළුණු ගෙඩියක්වත් ලියාගන්නට බැරි මට පොල් මැල්ලුම මලවාගන්නට බැරි විය. ඒත් මොනම හරි එකක් ලියාගත්තේය...... රස වැහෙන දුමිගේ පොල් මැල්ලුම ද රස්තිගේ පොල්මල්ලුම ද ඉතා රසවත්ය. ඒ අතරේ පොල්මැල්ලුම් ෂානරයේ 'ප්‍රබුද්ධ' කෙටිකථා මේ අයුරින් පෙළගැසී ඇත්තේය.

Monday, June 26, 2017

ස්තුතී........

මං  පොඩි කාලේ  
"ඔයා ලොකු උනාම කව්රු වෙන්න ද කැමති?" 
දෙවරක් නොහිතාම 
"අම්මා කෙනෙක් වෙන්න " 
මං එහෙම කිව්වේ ඇයි කියලා කව්රු හරි ඒ වයසේදී ඇහුවනම් ඇත්තටම මං දැනගෙන හිටියේ නැ....

තව දෙයක් ආගමික පසුබිමත් එක්ක බුද්ධත්වය ලබන්න නම් පිරිමි ආත්මභාවයක් ලබන්න ඕනේ කියලා කියවෙන සාහිත්‍යමය සටහන් කියවපු මං හැමදාම හිතුවේ මං කවදාවත් බුදුබව ප්‍රාර්ථනා කරන්නේ නැ කියලා.... 
ඒ මට මගේ තාත්තා තරම් වගකීම් දරන්න බැ කියලා හිතුන නිසා....

මේ වගේ වටපිටාවක සිතුවිළි පෝෂණය වී වැඩුණු මගෙන් අද ඔබ ඇහුවොත් 
"ඔයා මොනාද කරන්නේ?" 
මං ගෘහණියක් 
"නැ රැකියාවාක් කරන්නේ නැද්ද ?"
පැහැදිලිවම නැ... මං කරන්නේ සේවාවක්.... 
"ඒ මොකද්ද "
මං දුක අසන්නියක්... ජිවිතේ වැරදුනු තැන් නිවැරදි කරගන්න මඟ පෙන්වන්නියක්....
මා නිවැරදිව හඳුනාගත් සුළු පිරිසක් 
"ඇයි ඔබ ඔබේ අත්දැකීම් ලියන්නේ නැත්තේ..?" 

කිසිවක් මගේ අත්දැකීම් නොවනමුත් මා ලිවිය යුත්තේ කිසියම්ම කෙනෙකුගේ ජිවිතයය....... මිනිස් ජිවිත තුල ගඳ ගසමින් පැසවන කුණු ගඳට ඕනෑම සමාජයක ඉහළ ඉල්ලුමක් ඇතිමුත් මා ඒ ඔඩු දුවන තුවාල අපුලකින් තොරව සැරව පිස සුවපත් කරන්නට උපකාරවන සහායකයකු මිස එකී දුක අවුස්සා බෙදාගෙන කන්නට කෑ ගසනා කාක්කකු නොවෙමී.. 

නමුත් ඔබ කි පරිදිම කතා සමුහයක සාරාංශය තවකෙනෙකුට පිහිටක් විය හැකි නිසාම තෝරා බේරාගත් සමාජ ගැටළු කිහිපයක් ගැන ලියා තබන්නට මෙලෙසින් ඇරඹුම සටහන් කරන්නට සිතුවෙමී.....

ගිය අවුරුද්දේ මැයි මාසේ අටවගත්ත මගේ වියුණුව අකල්බකල් වෙලා ආයෙමත් අටවා ගත්තේ 2016 ජුනි 17. ඉතිං අවුරුද්දක් වෙන තැන , 
වැඩිහිටි වයසේ මං තුල ජිවත් වන ළදැරියක ගේ මනසින් සැහැල්ලුව ජිවත් වන කතාකරන මං එරන්දී තුල ලියවෙන ලිපි අතර සීමිත ලිපි ප්‍රමාණයකින්ඔබට වැඩිහිටි මං එරන්දී හමුවන්නට හැකිවනු ඇති.....
අවුරුද්දක් වෙන මං එරන්දී එන්න නිතර කියවෙන "මෙලෝ රහක් නැති" විශේෂණය ඇත්තටම මගේ නමේ ඉස්සරහට ආපු හැටිත් මේ එක්කම ලියන්න මට හිතුනා.... ඒ හෘදයාංගම හැඳින්වීම මා වෙනුවෙන් කලේ මෙන්න මෙතුමා
විවිද තැන්වල විවිද අය මේ වචනේ යොදාගත්තත් මං එරන්දී මෙලොරහක් නැති බව දැන, යොදාගත් රහස මෙයයි... 
කතාව ඇත්තය, එහෙව් මාව කියවමින් දිරිමත් කළ ඔබ සියළු දෙනාට ස්තුතී කියන ,  
මෙලෝ රහක් නැති 
මං 
එරන්දී :)

Friday, June 2, 2017

ආයෙත් අවුලක්

බ්ලොග් එක update වෙන්නේ නැ.....

මං එරන්දී

මගේ Politics


ඡන්දයක් ලංවන විට නිල් පාටින් ද කොළ පාටින් ද වාද විවාද කරගන්නා අම්මා ද තාත්තා ද එයින් නොනැවතී කෑම මේසයේ අහක බලාගෙන කන පුංචි අම්මලා සහ බාප්පලාගෙන් ද සැදුම් ලද පවුලක ඉපදී හැදීවැඩුන මට අදට ද පුදුම වන්නට කාරණාවක් වන්නේය. එනම් ලොකු අම්මා , අම්මා සහ පුංචි අම්මලා කැපුවත් කොළ වූ අතර ලොකු තාත්තා, තාත්තා සහ බාප්පලා එක හෙලාම නිල් වන්නේ කෙසේ ද යන්නය..
න්ද පොළට යන තුරු වෙන වෙනම වාහන දෙකක යන නෝනලා සහ මහත්තුරු න්දය ප්‍රකාශකර එන විට අහුවෙන වාහනයේ නැග එන්නේ ප්‍රථිපල බලන්නට උවමනා කෑම බීම සපයා ගැනීමටත් ඒවා රැගෙන අම්මලාගේ මහ ගෙදරට හැකි ඉක්මනින් ලගාවනු පිණිසත්ය.
කැවිලි වර්ග වල සිට කට ගැස්ම ද රාත්‍රී ආහාර යේ සිට උදැසන ආහාරය දක්වා ද කොට්ට මෙට්ට වල සිට දත්බුරුසු දක්වා ද සියල්ල පටවාගෙන යන අප එකල අසල්වැසියන් දකින්නට ඇත්තේ ගම් රට අතහැර යන පිරිසක් ලෙසින් වියයුතුය. පොල් පටවාගත් විවිද වර්ගයේ වෑන් රථ පහක් එක මිඳුලක ගාල්වන්නේ වෑන් සෙල් එකක සිරිය මවමින්ය. අහිංසක වාහන වල අතුරු සිදුරු නැතිව ගෙවල් වල උදවියද කණකර ආභරණ වල සිට කන් හැන්ද දක්වාද පටවාගෙන එන අපේ අම්මලා මොන තරම් සංවිධානාත්මක ද කිව්වොත් එකෙකුගේ හෝ කිරිබෝතලක් නැත්තම් ළදරු කිරිපිටි ටින් එක අමතක කර ඒම පරම්පරාවේ සිරිතක් ලෙසින් නොකඩවා කරගෙන ආ අතර එවිට shift ක්‍රමයට මාරුවෙන් මාරුවට බලහත්කාරයෙන් උඳුරා ගනිමින් ගෙදර පොඩි එකාගේ කිරි බෝතලයෙන් පවුල් පහේම පොඩි එවුන් කිරි බීවේ තුං සිංහලයම නෑදෑයෝ බව මතක් කරමින්ය.
ඉතිං එය එසේ වියයුතුය , විවිද පළාත් වල ඉපිද හැදී වැඩි ඇති මුත් ලොකු තාත්තාගේ සිට චූටි බාප්පා දක්වා සියල්ලෝම බිව්වේ එකම ලේබලයේ නැටුන් තෙල් වන අතර එය ද පස් දෙනා සමඟින් එක බෝතලය රැ එළිවෙන තුරු යන මාත්‍රාවෙන් ය. ඒ නිසා පොඩිවුන්ද එකී ආදර්ශය සිහියට ගත යුතුම විය.
න්දය බලන්නට රැස් වන අම්මලා පැමිණෙන්නට නියමිත විවාහ උත්සව ගැන ද පස්දෙනාම එකම පාටින් හෝ බෙනාරිස් හෝ මනිපුරී ගෙන්නනවා ද ගිහින් ගන්නවා ද වැනි බරපතල කාරණා සිය අවදානයට ගන්නා අතර පස්දෙනාගේම හතුරන් සමඟ හවුලේ තරහා වීම ට අවශ්‍ය කෙටුම්පත් සකස්වන්නේ ද ඔය අල්ලපනල්ලේය.
මහ ගෙදර පදිංචිව සිටි සුදු අම්මා හෙවත් අම්මගේ ලොකු නංගී මං හිතාගෙන හිටියේ අපේ අම්මාගේ නිවුන් සොහොයුරිය ලෙසිනි. පෙනුමෙන්ද ගතිගුණ වලින් ද ඇය බෙහෙවින්ම අපේ අම්මා ම විය. සුදු අක්කා ද මගේම අක්කා වූ අතර බාප්පා රට රට වලින් ගෙන එන සියළු පාට පැන්සල් මං හිතුවේ මට ද අයිතියි කියාය. ඉතිං න්දෙ බලන්නට යන අප සුදු අක්කාගේ පාට, පොත් පමණක් නොව ඇඳුම් ආයිත්තම් ඇද Fashion Show ද කළේය. සුදු අම්මගේ මිල අධික Makeup උලාගන්නා නිශා අක්කා සහ මම රුකඩ වගේ පෙනුන බව බාප්පලා විසින් අපේ අනාගත සුබ සිද්ධිය සඳහා වීඩියෝ සහ චායාරූප ලෙසින් සංරක්ෂණය කර ඇති නිසා තක්කෙටම කිව හැකිය.
රාත්‍රී නවය පමණ විට කෑම මේසය පිරෙන්නට විවිද කෑම ද තේ පෝච්චි පිරෙන්නට කෝපි ද පුරවා ගන්න අම්මලා ද සාලයට පැමිණෙන්නේ කාඩ් කුට්ටම්ද රැගෙනමය. හෙළයේ ගීත කෝකිලාවන් වන ලොකු අම්මා ද අම්මගේ දෙවෙනි නංගි ද සිය අත්බෑගයේ හී නොවරදින ගීත පොත් එලියට වඩම්මනා මුත් අනුකූලතාවක් නොවන තැන යලිත් මළුවලට ඔබාගන්නේ අන් අයගේ නොහැකියාව ට දෙස් දෙමිනි.
මේ සියළු සුදානම් අතරේ බඩට පටාවා ගත හැකි උපරිමය ගිලගන්නා ළමයි අපි ඉදිරිපෙළ මෙට්ට පැදුරු වල වැටී පසඟ පිහිටුවා රූපපෙට්ටියට අනිමිසලෝචන පූජා පවත්වන අතර රාත්‍රී දහය පසුවන විට විවිද ඉරියව්වෙන් එකාපිට එකා සමාදිගත වීම ද  සම්ප්‍රදායේම කොටසකි.

එතනින් නිමාවන අපේ ඡන්ද ප්‍රථිපල නිරීක්ෂණය ගැන අදට ද කිසිම මතයක් මට පලකළ නොහැක්කේ අදටත් අපේ පරම්පාරාවේ මගේ දෝණිගේ සිට සහෝදරසහොදරියන්ගේ දරුවන් හා තවම Fashion show කරනා මම අපේ ලොකු අක්කාගේ Makeup උලා පොඩිවුන්ගේ පිංතුර ගනිමින් කාලය ගතකර කා බී ඉදිරිපෙළ මෙට්ටයක දහය පහුවන විට එකම සමාදිය තවම වඩනා  බැවිනි.
එය එසේ වුවද පසුදා රාජකාරි වලට මුහුණ දීමට ඇති නිසා මහ පාන්දර ඇහැර ගන්නා අපි පොඩි set එක මවගේ බසින් වහරන්නට දන්නා අප කැපුවත් අම්මලාගේ පැත්ත ගෙන තාත්තලාට අම්මලා කියනා කතා වලින්ම උසුළු විසුළු කරගනිමින් එලියට පැන සෙල්ලම් ගෙවල් වල පදිංචියට යන්නේය. මේ අතර මට මතක ඉතිහාසයේ ආණ්ඩු පෙරළුණු දා සුදු අම්මාට ප්‍රෙෂර් වැඩි වූ බව නම් හොඳටම මතකය.
මට චන්ද අයිතිය හිමිවන විට අම්මගේ පැත්ත ගන්න ද තාත්තාගේ පැත්ත ගන්න ද යන දෙගිඩියාවෙන් උන් මම පළවෙනිම න්දය අවලංගු කර ගෙදර ආවේ දෙමව්පියන්ට අකීකරු වන්නට නොහැකි නිසාය..
එකී චන්දය වන විට අපේ ලොකු අක්කා ඇතුළු පවුලේ සියළු ලොකු අක්කලා අයියලා විවාපතව හෝ වැඩිදුර අධ්‍යපානය සඳහා රටින් පිවගොස් සිටි අතර ඒ සිට අද දක්වා සියල්ලෝම එකට චන්දය බැලූ කාලයක් මතකයේ නැත.... එහෙව් මගේ දේශපාලනඥානය මෙතරම් සියුම් සහ විනිවිධ හා තර්කානුකුල බවින් ද සමන්විත වීම පාඨක ඔබගේ ඉමහත් පුදුමයට හේතූ නොවණු ඇතැයි තරයේ විශ්වාස කරනා
මං
එරන්දී 

ප.ලි. මෙය කලින් ලියා තැබූ පොස්ටුවක් වන අතර ලියන්නට තරම් හිතට නිදහසක්ද නැත. හිතට දැනෙන වෙහෙස මඟහරවා ගනු පිණිස ම මෙය පලකරමි

Wednesday, May 10, 2017



හඬන්නට නොදන්නා මට 
ඇඟිල්ලෙන් ඇන
කඳුළු දුන් ඔබ 
හඬන විට 
රිඳුම් දුන් හිස හොවන්නට 
පුළුල් උරහිස නොදුන් ඔබ-මට  
අඳුරු අහසේ 
දකින්නට තරු අරුන්දතිය මට
හෙළිපෙහෙළි කළ පිණෙන් තිමිරය
වගුරුවා ලු කඳුළු වලින් පිස  
ඔබට නිති පසසමි හදවතින් 
මම
එරන්දී....... 


Sunday, May 7, 2017

කවි සිතුවිල්ල....

Minnie Ashley (1897)
එකම එක කවක් වත්     නුඹ නොලීබව මා නමින් 
නො' අදහමී
නුඹ නොකීවද 
දිව්රා මුත් - ඉඳුරා නොවන 
ලෙසින්...... Cannot believe
I won't believe 
You didn't write anything 
Just for me..................... 


එකම වදනකුදුත් 

නොලියෙන 
නුඹේ සිතුවිළි 
පන්හිඳට 
පැන් පුරණ 
අරුම සුවඳ 
වෙමිය මම... 

සුසුමින් ම හැඩ වැටුන 
නුඹ නොලී 
නුඹ නොකී 
Minnie Ashley (1878-1946) 
හදෙහිම රැඳුනු 
දුක හිතෙන 
දුක නිවන 
පස්ගෝ රස පිරුන  
ඒ මිහිරැති 
කවිය 
වෙමිය 
මං 
එරන්දී....................

අප්‍රතිහත ධෛරයෙන් යුතුව සාර්ථකව ජීවීතයට මුහුණ දුන් ඇය පිළිබඳව මෙම ලියවිල්ලට හේතූ වන්නේ සිතුවමක් තරම් සුන්දර ඇය ආසන්න වශයෙන් සෙසිල් බි. ඩිමිල්ලේ නම් නිර්මාණකරුවාගේ සියළුම චිත්‍රපට වල රඟපා ඇතැයි වාර්තාවන බැවින් ඒ ඇය කෙරෙහි යම් ප්‍රේමනීය සිතුවිල්ලක් ඔහු තුල අප්‍රකාෂිතව සිතේ තිබු නිසාදැයි යන කාව්‍යමය කුකුස මත පදනම්ව මිස එය එසේ උවද නොවුව ද අතිශය පෞද්ගලික කාරණාවක් බවත් ජිවතුන් අතර නැතත් ඔවුන් කෙරෙහි අගෞරවයක් කිරීමේ අරමුණක් නොවන බවත් සටහන් කරණු කැමැත්තෙමී.
මිනී ඇෂ්ලි, යනු 19 වන සියවස අග බාගයේ දිනෙන් දින සාර්ථකත්වය කරා ගිය සුරූපී ගායිකාවක් සේම නර්තන ශිල්පිණියක් ලෙස ද දක්ෂතා දැක්වූ ශිල්පිනියකි. ස්වභාවයෙන් ඇය ඉතා රූමත් සේම සිය වෘර්තිය ජීවිතයේදී තියුණු ඉවකින් සිය සාර්තකත්වයෙහි හිණිපෙත්තටම ගිය දක්ෂයෙකි. කරුණාවන්ත, උද්‍යෝගීමත් වගේම කාර්යශූර ශිල්පිණියකි. සිනමාවේ (Stardom) ප්‍රතිභාව පුර්ණ ශිල්පිනියක වූ ඇය රූපගත කිරීම් වලදී නිරන්තරයෙන් අධෝරක්ත කිරණ වලට නිරාවරණය වීම නිසා ඇයගේ ආකර්ෂණියවූ නෙත් සඟලේ හී පටල ක්ෂයවිමෙන් ඇය පීඩා වින්දාය. 
1902 දී ඉතා ධනවත් දේශපාලනඥයකු වූ විලියම් ඇස්ටර් චැනලර් හා විවාහයත් සමඟම සිය රඟපෑම නවතා දමා සිය ඇස් පරික්ෂා කරගැනීම සඳහා දෘෂ්ටි විශේෂඥයින් සොයා යෑමට තීරණය කාලය. නමුත් ඇයගේ පෙනීම පහත වැටීම නිසා බියට පත් ව ඔවුන් මිනී ව ස්පර්ශයෙන් කරන්නාවූ ප්‍රති නිර්මාණකරණයට යොමු කරන ලදී. පසුව වසර 1909 දී විලියම් පැරිසියේ පදිංචියට යාමට තීරණය කිරීමෙන් අනතුරුව මිනී විලියම්ගේ පුතුන් දෙදෙනා රැකබලා ගනිමින් ඇමරිකාවේ ජිවත් වීමට කැමැත්ත පලකළ නිසා දෙදෙනා සුහදව වෙන්ව ජීවත්වීමට තීරණය කරන ලදී . 
වේදිකාවෙන් සමුගෙන දශකයකට පසු මෙම අග්‍රගන්‍ය ශිල්පිණිය , එනම් වසර 1911 දී නැවතත් සිය හස්ත භාවිතයෙන් රංග ප්‍රති නිර්මාණකරණයට පිවිසියේ " A Country Girl" නම් නිර්මාණයෙනි. එයින් මතු හස්තමුද්‍රා රංග කලාව සිය ජන්මයෙන් ගෙන ආ තරම් බුහුටිව හැසිරවූ ඇය  බියට්‍රිස් ඇශ්ලි චැනලර් නමින් එතැන් පටන් පෙනී සිටියාය. 
පසුකාලින ජිවිතයේ පරාර්ථකාමී තැනැත්තියක ලෙස ඉතා සාර්ථකව එම කාර්යයයේ නියළුනාය.බොහොමයක් ලේඛන වල ඇයගේ උපන් වර්ෂය 1886 ලෙස සඳහන් ව ඇති මුත් නියම වර්ෂය 1878-1946  ලෙස  මා පරිශීලනය කළ මුලාශ්‍ර වලින් සොයාගත හැකි විය. 

ඇය ලබා ඇති ජයග්‍රහණ සහ ප්‍රකට කළාවූ දිරිය සම්පන්න බව ඇගයීම සඳහා මේසේ ලියා තබමී   
මං 
එරන්දී....................

Thursday, May 4, 2017

Interpretation Definition In Poetry ... "අන්තර් නිවේශනයේ" පද්‍යුය අර්ථදැක්වීම



අන්තර් නිවේශනය (Interpretation) ; ඔබට මට පොදු නොවන , ඔබ - ඔබට ද මා - මට ද සිත - සිතුවිළි කෙරෙහිම නැවුණු තැනක ඉපදී විටෙක ඉරටු මිටියක් රේඛියව බැඳී; ලේ පාට බොරළු පහුරු ගා උගුල් වා සූරා දැමීමේ සිට සිනිඳු බෝ මාළුවෙක සියුම්ව මැවෙන රටාවක් දක්වා ද ලිප් ගල් තුනක සිරවූ මැටි ඇතිලියක සිට Italian burner එකක Ceramic බඳුනක ඉදෙන මසවුළ දක්වා ද පොරවකින් පැලෙන ලී කොටයේ සිට සැත්කම් පිහියෙන් කැපෙන මිනිස් සිරුර දක්වා ද ඉන් එපිට රස්තා රෙගේ සිංදුවකින් ද පන්සලක පල්ලියක කෝවිලක දෙවොලක නැගෙන සඤ්ඤායනය තෙක් වන පරාසය තුල ද ඉන් එපිට කී-නොකී පරාසයෙහි ද ප්‍රකාශිතයයි.
                                                විටෙක ගීතයකට සුරුවම් බෑමෙන් ද අත්තල ගැසීමෙන් ද අඩි පෑගීමෙන් ද සිය මනෝභාවය එළිදක්වන්නා වූ චිත්තය, විචිත්‍රවත් ව චිත්‍රයක් ලෙසින් ද අකුරු වල පැටලී කවියක් ලෙසින් ද කවියක් තනුවක වේලි සංගීතවත්ව ගීතයක් ලෙසින් කම්පිතව විශ්වයට මියුරු  කම්පනයක් ලෙසින් මුදාහරවයි, සිත ඇත්තේ කොතනදැයි නොදන්නා මුත් සිතුවිළි වල හටගැනීම ද අවසානය ද අතර සියල්ල ප්‍රේහේලිකාවක් මුත් භාවය යනු ශක්තී ප්‍රජනකයකි, එකී ශක්තියෙහි ප්‍රකාශන ස්වරුපය  "අන්තර් නිවේශනය" හෙවත් Interpretation නම් වේ...  
                                        සහෘදය එනිසාම කියමි ; ලේඛකයින් , කවියන් , විචාරකයන් හෝ එකී මෙකී කිසිදු සුදුසුකමක් ඔබ හා මා සපුරා නැතත්
        " සිතුවිළි         මරා           වළලා          තැනෙන         ලාවා           දිනෙක         පුපුරා         යා-නොයාද         හදවතක         ලේ         කුහර         පුපුරා"

Killing & burring your  thoughts make your Interpretations unborn & grow as lava will lead cardio vascular explosion in you 

ඉතිං ලියමු රහක් නැතත්, ලියන
මේ
මං එරන්දී වගේ.......


Wednesday, April 26, 2017

එසේ මුත් මේසේ ද විය හැක....


කවියක සිරව 
සියදිවි නසාගත් 
ප්‍රේමයක්; 
මිහිදන් කරනු බැරි තැන 
පා කළ බැවින් සුසුමෙක
කැළඹී ඇවිලී සුළි කුණාටුවෙක  
බෙංගාල බොක්කේදී 
පසුව 
ටර්නැඩොවක් වූ බව
අසන්නට ලැබුණි 
සුනුවිසුනු රොඩු බොරඩු 
මැදින් මතුවූ 
හීතලට මිඳුණු 
අසරණ 
ගල් ගැසුනු
බිළිඳු සිනාවෙකින්.........



අකුරු වල එති ගෙතෙන වචන රටාවෙක මා දකින්නේ ගෝලයක්  මුත් ඔබට එහි සඳ දැකිය හැක..... හෙළ බස හෙවත් හෙළයේ බසෙහි අපුර්වත්වය එයයි......මෙම නිර්මාණයේ සමස්ත අර්ථයම අවසන් වචන පෙළ වන "අසරණ බිළිඳු සිනාවෙක " යන කොටස නිසා විවිධාකාර අදහස් ගම්‍ය කරවයි. බසෙහි මිහිර විඳින්නට ඔබ මෙහි යායුතුමය... අක්ෂර නිවැරදි බව තහවුරු කරන්නට සුබස
වෙත යාම නුවණට හුරුය.  


මං එරන්දී 

Friday, April 21, 2017

නරසීහ ගාථා Naraseeha Gatha

යශෝදරාව සහ පුත් රාහුල 


චක්ක වරං කිත රත්නසුපාදෝ
Cakka varankita ratta supādo 
ලක්ඛණ මණ්ඩිත ආයතපණ්හි
Lakkanu mandita āyata panhī
චාමර ඡත්ත විභූසිත පාදෝ
Camara chatta vibhūsita pādo
ඒස හි තුය්හ පිතා නරසීහො
Esa hi tuyha pitā narāsīho
   නැකත් ලකුණු වලින් හැඩවූ රත් පැහැ දෙපතුල් ද සක් ලකුණින් යුතු විලුඹ හා  දිගු වළලුකර ද ඉතා අලංකාර විචිත්‍රවත්
මොනර පිහාටු වැනිය . එසේය පුත, ඒ වඩින්නේ  ඔබගේ  පියාය 


සක්‍ය කුමාරවරෝ සුකුමාලො
Sakya kumāravāro sukhumālo 
ලක්ඛණවිත්ථත පුණ්‍ණසරීරො
Lakkhana vitthata punna sariro
ලොකහිතාය ගතො නරවීරො
Loka hitāya gato narāvīro 
එස හි තුය්හ පිතා නරසීහො
Esa hi tuyha pitā narāsīho


"ශාක්‍ය" නම් උතුම් රාජකීය කුලයේ උපන් සියුමැළි වංශවත් කුමරු, සොඳුරු ලකුණින් පිරිපුන් සිරුරක් ඇත්තාවූ  සියළු සැප සම්පත් ද (ලෞකික සැප පහසුව) සමස්ත ලෝකයේ අභිවෘද්ධිය සඳහා අත්හල, පුත.! බලන්න ඒ වඩින්නේ  ඔබගේ
පියාය


පුණ්ණ සසංක නිහෝ මුඛවණ්ණො
Punna sasanka nibho mukha vanno
දේවනරානපියෝ නරනාගො
Deva narana pīyo naranago
මත්ත ගජින්ද විලාසිත ගාමී
Matta gajinda vilāsita gāmi 
එස හි තුය්හ පිතා නරසීහො
Esa hi tuyha pitā narāsīho

අඳුරු අහස මත දිදුලන පුන් සඳ මෙන්, සියලු දෙව් මිනිසුන් අතර බබළමින්  , පුත බලන්න, රාජකීය හස්තියෙකු ගේ ගමන් විලාශයෙන් වඩින්නේ ඔබේ පියාණන්ය



ඛත්තිය සමිභව අග්ගකුලීනො

Khattiya sambhava aggā kulīno 
දේවමනුස්ස නමස්සති පාදො
Deva manussa namassita pādo 
සීල සමාධි පතිටිඨිත චිත්තො
Sila Samadhi patithita cītto 
එස හි තුය්හ පිතා නරසීහො
Esa hi tuyha pitā narāsīho

රාජකීය වන්ශිකව උපන් ඔහු තවද සියලු දෙව් මිනිසුන්ගෙන් වැඳුම් පිදුම් ලබන්නේය. පියවරෙන් පියවර ශාන්තව මානසික එකාග්‍රතාවයෙන් වඩින ඔබේ පියතුමන් ගේ විලාශය පුදුමයකි..



ආයත තුඞ සුසන්ඨිත​ නාසො 

Ayata tunga susanthita nāso 
ගෝපමුඛො අභිනීල සුනෙත්තො 
Gopamukho abhinīla sunetto 
ඉන්දධනූ අභිනීල භමුඛො 
Indadhanū abhinila bhamukho 
ඒස හි තුය්හ පිතා නරාසීහො
Esa hi tuyha pitā narāsīho

නීල වර්ණ ඇස් ද සෘජු නාසය ද දේදුණු හැඩ ඇති ඇහි බැමද සහිත ඔහු, පියාය මාගේ පුතුගේ.



වට්ට සුමට්ට සුසන්ඨිත​  ගීවො

Vatta sumatta susanthita gīvo
සීහහනු මිගරාජ සරීරො 
Sihahanu migarāja sarīro 
කඤ්චන සුච්ඡවි උත්තම වණ්ණෝ
Kancana succhāvi uttama vanno 
ඒස හි තුය්හ පිතා නරසීහො
Esa hi tuyha pitā narāsīho


ඔහු ගේ පෞර්ෂය සම කළ හැක්කේ රාජකීය සිංහයෙකුට නමුත් ඔහුගේ අවිහිංසක කම සමකල හැක්කේ මුවෙ රජ කුටය.ඔහුගේ සිරුර උද්දිප්තව බබළන්නේය(සවනක් රැසින්).ඒ වඩින්නේ ඔබගේ පියාණන්ය


ස්නිද්ධ සුගමිභීර මඤුසු ඝොසො 

Suniddha sugambhira manjusu ghoso
හිංගුල බන්ධු සුරත්ත සූජිව්හො 
Hingula bandhu suratta sūjivho 
වීසති වීසති සේත සුදන්තො
Visati vīsati seta sudanto 
එස හි තුය්හ පිතා නරාසීහො
Esa hi tuyha pitā narāsīho

සෞමය ඔහුගේ හඬ,අනුනාද වන්නේය. හිඟුලරත්පහැති දිව ද එක හනුවක විස්ස බැගින් මනහරව පෙළගැසී ඇති දත් ද  මුඛයේ පිහිටි, පුත ඒ ඔබගේ පියාණන්ය.



අඤ්ජන​ වන්න සුනීල සුකෙසො

Anjana vanna sunīla sukeso 
කඤ්චන  පට්ට විසුද්ධ ලලාටො
Kancana pātta visuddha lalāto 
ඕසධි පන්ඩර සුද්ධසු උන්නො 
Osadhi pandara suddhsu unno 
එස හි තුය්හ පිතා නරාසීහො
Esa hi tuyha pitā narāsīho


කාලවර්ණ හිසකේ නීල වර්ණයෙන් බබළන්නේය. නළල් තලයෙන් අලංකාර වූ රැස් විහිදෙන අතර ඒ මත වැටුණු (මංගල ලකුණක් වන)  ඌර්න රෝමධාතු වකි. මුළු සිරුරින්ම රැස් විහිදුවන ඔහු , පුත ඔබගේ පියාණන්ය.



ගච්ඡති නීලපථෙ වීය චන්දො

Gacchati nilapathe vīya cando 
තාරගණා  පරිවේඨිත​ රූපො 
Taragana parivethita rūpo 
සාවක මජ්ඣගතො සමනින්දෝ 
Sāvaka majjhagato sāmanīndo 
ඒස හි තුය්හ පිතා නරසීහො 
Esa hi tuyha pitā narāsīho

තරු පිරිවැරු පුර්ණ චන්ද්‍රයා සේ , තම ශ්‍රාවකයින් මද්‍යයේ වඩිනා පියාණන් දකින්නට පුත මෙහි එන්න.

බුදුරජාණන්වහන්සේ , ගිහිකළ නෑසියන් දකිනු පිණිස වැඩි මොහොතේදී යශෝදරාවන් විසින් තම පුතු රාහුලට ඔහුගේ පියා පෙන්වමින් කළ ප්‍රකාශය "නරසීහ ගාථා " නම් වේ..

මෙම සටහන ලියන්නට හේතූ වුයේ රසිකොලොජියේ පෝස්ටුව වන අතර මෙහි ඉංග්‍රීසි සටහන ලබාගත්තේ  Theravada Damma  වියණුවෙනි. සිංහල පරිවර්තනය සඳහා පාදක කරගත්තේ the Tek Croach වියුණුවේ

Yashodhara's crying heart (Narasimha gatha) 


ලිපියේ පාළි - ඉංග්‍රීසි පරිවර්තනයයි.
යශෝදරාවත මෙතනින්.

මේ ලිපිය සම්පාදනයට හේතුවක් සැපයු අයට ද අවශ්‍ය මුලාශ්‍ර නිර්ලෝභීව සයිබර් අවකාශයට එක්කොට තැබූ සියළු දෙනාට ගෞරවය මේසේ සටහන් කරන
මං
එරන්දී

මෙය   ආත්මතෘප්තිය සඳහාම මා විසින් කරන ලද කාර්‍යයක් වන අතර යම් අඩුපාඩුවක් වේ නම් නිවැරදි කරන මෙන් කාරුණිකව ඉල්ලමි



රසික ඔබේ පොස්ට් එක නිසාම කම්මැළි මටත් නිමිත්තක් ලැබුනා. බොහොම ස්තූති...